الفرق بين سويتشات الكيبوردات الميكانيكية

السويتشات هما 3 أنواع رئيسية:

• النوع الأول يكون Clicky & Tactile على الأغلب يكون لونه ازرق
• النوع الثاني يكون Tactile & Bump على الأغلب قهوي.
• النوع الثالث يكون Linear & Quite على الأغلب احمر

توا نبو ندوو على مواصفات السويتشات حتى بعدين نقدروا نفرقّوا بيناتهم.

• اول حاجة هي الTravel distance وهي المسافة الي يقطعها السويتش لين اخر شي وهي عادتاً في السويتشات العادية تكون 4mm.
• تاني حاجة الActivation Force وهي بإختصار مقاومة السويتش لضغطتك.
• واخر حاجة هي الActuation وهي المسافة الي تضغطها و يستجيب الزر.
  يعني مش لازم تضغط الزر لأخر شي حتى يستجيب.
  وهي على حسب السويتش نفسه لكن على الأغلب تكون 2.0mm يعني نص ضغطة لو كانت الترافل ديستنس 4mm.

نبدو بالسويتش ال Clicky & Tactile:

لو ضغطت هذا السوتش حتسمع صوت كلك و حتحس بالضغطة، ومقاومة السويتش تكون ما بين 50gm الى 55gm.
ونفس الشي الActuation point على الأغلب 2.0mm او 2.1mm
وزي ماقلنا فوق اهوا عادتا يكون لونه ازرق.

السويتش الثاني Tactile & Bump:

شبه زي الأزرق لكن الفرق بدون Click و مقاومة السويتش للضغطة 45gm.
وزي ماقلنا فوق اهوا عادتا يكون لونه قهوي.
القهوي حتحس بحاجة مشابهة للClick لكن مش حتسمعه يعني تقدر تقول القهوي هو أزرق هادي.

السويتش الثالث Linear & Quite:

ميزة هذا السويتش انه مافيشي لا صوت Click ولا احساس بشي مشابه له و مقاومته 45gm.
السويتش ينزل Smooth بدون مشاكل وصدقني إذا كنت اول مرة تجربه بتلقى روحك ضاغط زرين و انت ماتندريش، يبيلك فترة تتعود.
لأنه خفيف و مافيش شي تحس بيه ب استجابة السويتش.

فيه انواع ثانية زي الأخضر وهو نفس الأزرق لكن بمقاومة أعلى.
وفيه الClear الي هو نفس القهوي لكن مقاومة اعلى.
وفيه الأسود الي هو نفس الأحمر لكن مقاومة اعلى.

طبعا الي منتشر بين الناس المدة أهيا ان:

• الأزرق للي يكتبوا.
• القهوي للي يلعب و يكتب.
• الأحمر للي يلعب بس.

لكن اهوا تفكير خاطيء جداا، وماتسمعش كلام حد لين تجرب بروحك وتشوف شن يمشي معاك.

مافيش حاجة اسمها اهوا السويتش متع ألعاب واهوا متع كتابة، هوا كيبورد قيمنق من اسمه قيمنق، يجي حد يقولك متع كتابة، تي حتى بالمنطق.

مافيش حاجة اسمها خود الأحمر او الازرق او القهوي اهوا احسن واحد، كل انسان وذوقه وشن يمشي معاه، لو انت انسان هامك الموضوع هلبا، تقدر تشري من الامازون حاجة اسمها “9Key Switch Tester.”، يخليك تجرب السويتشات كلهم بش تعرف شن الي يمشي معاك فيهم.

اني بروحي نشوف في أجانب يجربوا فيهم كلهم في اليوتيوب، وقال الأزرق أحسن واحد واكثر واحد استريحتله، وفي ناس الي تكتب هلبا، مامشاش معاهم الا الاحمر، مع ان زي ما هو منتشر ان الازرق هوا متع كتابة.

الملخص ان نوع السويتش الي تختاره يعود ليك انت، كل انسان وشن يمشي معاه، ومافيش سويتش اغلى من التاني، نفس السعر كلهم، ولو كان في فرق سعر معنها مجرد تسويق مدايرينه وخلاص.

ياريت تشارك المنشور مع اصدقائك حتى يستفيدوا حتى هما، وأي حد يبي يسأل يتفضل يسأل في التعليقات وخلي نتناقشوا كلنا حتى الي عنده معلومة غلط يصلحها لتاني.