شرح عن السماعات – الجزء الأول

حيكون في أكثر من جزء لهذا الشرح بسبب كثرة التفاصيل وعدم رغبتنا بإطالة المنشور أكثر من اللازم.

في سلسلة الشروحات عن السماعة حنشرحوا كيف تختار السماعة المناسبة ليك، ويعتمد الموضوع عن ما اذا كنت تبيها للكمبيوتر او للفور او للإكس بوكس وحنشرحوا كيف تقرا مواصفات السماعة وتفرق بيناتهم ان شاء الله.

مبدئياً لما تبي تختار أي منتج أول وأفضل خطوة انك اديرها هوا انك تبحث عليه في النت، أي حد عنده نت هوا على بُعد خطوات قليلة من البحث للوصول إلى أغلب المعلومات الي يدور عليها، أغلب المنتجات العالمية حتلقى عليها فيديوات و تقييمات، ف بدل ما تختار منتج مجرد على خاطر شكله او مواصفاته ابحث عليه في اليوتيوب او في المتاجر العالمية وشوف آراء الي جربو المنتج وتقييمهم ليه قبل، الموضوع مش حياخد ثواني، أقل ما فيها ابحث على المنتج في الأمازون وشوف التقييمات الي عليه بصفة عامة من 5 لو ماتبيش تتعب هلبا، هذه أفضل طريقة تقدر تعرف روحك شن بتشري حتى ماتنصدمش بالمنتج لما يوصلك وتلقى روحك خديت منتج جودته أقل من المتوقع، في حتى مواصفات يمكن تكون ماتفهمش فيهم على الأغلب حتلقى مراجعة على اليوتيوب من شخص خبير يقولك شن العيب الي ممكن انت ماتلاحظاش من البداية، ف أول خطوة اديرها قبل ما تشري اي منتج هوا انك تبحث عليه في النت وتشوف التقييمات والمراجعات الي عليه بصفة عامة.
في حالة مالقيت عليه شي في النت ف المنتج مشكوك في أمره وينصح الإبتعاد عنه قدر الإمكان.

السماعات في أنواع وأشهر نوعين هما الستيريو والمحيطيات “إفتراضياً” 7.1

سماعات الستيريو عادتاً يجو وصلة 3.5مم أو ما هوا معروف لدى الأغلب ب “وصلة AUX”، اهما السماعات هما أريح سماعات في الإستعمال لأنهم يركبوا على أغلب الأجهزة، يركبوا على الفور والأكس بوكس والكمبيوتر والتلفون، السماعة الستيريو تتكون من قناتين للصوت، قناة للأذن اليمنى وقناة للأذن اليسرى، يعني لما تشري سماعة ستيريو حتقدر تفرق بين اليمين واليسار في اللعبة “مش المحيطية فقط تقدر”، لما تكون السماعة فيها ضي معنها حتلقى السماعة مخرجين على الأغلب، مخرج 3.5مم للصوت ومخرج USB للإضاءة، إذا كنت تبي سماعة فيها ضي فـلازم يكون في مخرج USB، في حالة كان المخرج 3.5مم فقط معنها السماعة مافيهاش ضي وهوا في الأخير يعتمد على ذوق الزبون، تقدر توصل مخرج ال3.5مم الخاص بالصوت وماتوصلش الUSB الا في حالة كنت تبي تخدّم ضي السماعة.

وسماعات ال7.1 الإفتراضيات “Virtual 7.1” وصلتهم USB او وايرلس، مافيش اي سماعة 7.1 وصلتها 3.5مم مثل ما يدعيّ البعض، احني شرحنا عليهم قبل السماعات المحيطية لكن بنعطوا عليهم نبذه مختصرة.
تقنية ال7.1 يستخدموا فيها في السينما وصالات العرض الكبيرة بحيث يتم توزيع 7 سبيكرات حول المتفرج بحيث يحس بالصوت من جميع الإتجاهات ويقدر يفرق بين قدام على اليمين ومن الخلف على اليسار الخ.. ، فـالسماعات حاولوا يستخدموا هذه التقنية بحيث ان يستخدموا برامج تتلاعب بالصوت بحيث توهم اللاعب كأنه في حواليه سبيكرات زي ما في السينما بالضبط لكن في الواقع هما عبارة عن سبيكرتين فقط مش 7 زي السينما، بعض السماعات حاولت ان تخليها 7.1 حقيقية مش إفتراضية لكن سعرها غالي جدا، ف السماعات المنتشرة توا اغلبها 7.1 إفتراضية وليست 7.1 حقيقية.

تقنية ال7.1 هيا تقنية إضافية ، لكن مش ميزة مهمه في السماعة، نلاحظوا ان اغلب الزبائن يبي سماعة محيطية وعلى باله ان اي سماعة محيطية معنها جودتها عالية وهذا التفكير بعيد كل البعد من الحقيقة، في هلبااا سماعات ستيريو جودتها عالية ولا تقارن ابدا بسماعات ال7.1، الستريمرز المشهورين أغلبهم يستخدموا في سماعات ستيريو حسب ماشفنا ويركبوا عليهم في كروت صوت خاصة بحيث تحسن من جودة الصوت قدر الإمكان.

الإكس بوكس ون لا يقبل اي سماعة USB الا سماعات مخصصة للإكس بوكس، تلقى في الباكو من برا موجود شعار الإكس بوكس، ف لو كنت تلعب بالإكس بوكس ون أفضل خيار ليك هوا السماعات الي مخرجهم 3.5مم او تشري سماعة USB مخصصة للإكس بوكس.

ملاحظة: على حسب خبرتنا لا توجد سماعات محيطية 7.1 للتلفون، زي ماقلنا فوق السماعة حتى تكون محيطية لازم من برامج خاصة بحيث تقدر تتلاعب بالصوت وتوهم اللاعب بأن هناك 7 سبيكرات حواليه، وكذلك مافيش سماعة مخرجها 3.5مم محيطية.

سماعة ال7.1 لن تستفيد بكل مزاياها إلا عن طريق تحميل البرنامج المخصص بها، والي هما عادتا يكونوا برامج للكمبيوتر، من وجهة نظرنا أفضل مخرج للسماعات هوا ال3.5مم لأن يخدم على جميع الأجهزة وتقدر تعرف المكان التقديري للعدو بإستخدامها بدون الحاجة الى تقنية ال7.1.

يعني بكل بساطة لما تبي تشري أي سماعة تأكد من ان جودتها عالية بس اما ميزة المحيطية من وجهة نظرنا هيا ميزة اضافية وغير مهمة بتاتا لأن في الأخير كله عبارة عن وهم بإستخدام برنامج، المحيطية ميزة لا تغنيك عن جودة السماعة، فإذا كانت السماعة جودتها ضعيفة مش حتفيدك ابدا ميزة الإحاطة الي فيها، من وجهة نظرنا سماعات الستيريو أفضل من السماعات 7.1 ولكن الأمر متروك للزبون بالبحث وإختيار السماعة الأفضل من وجهة نظره، ولو تبي تلعب بنظام صوت 7.1 حقيقي مش وهمي اشري 7 سبيكرات ووزعها على الدار الي تلعب فيها!

مزال ماكملناش الشرح على السماعات وحيكون في أجزاء أخرى للشرح في الأيام القادمة بعون الله.